Este libro encantoume (abril 2020)

ABRIL 2020

Recomendamos: Os ecos do lume de Anxo Fariña

 

Días despois de ler Os ecos do lume, o resón das súas palabras volve axitar a mente das persoas que o leron. Ese mergullo no mundo subterráneo que o autor nos ofrece para falarnos de ecoloxía, de incomunicación, de egoísmo, de amizade, de amor... é tan intenso que o mesmo libro semella ser unha pequena pedra que cae na superficie líquida das nosas emocións. O impacto da súa lectura provocará unha serie de ondas concéntricas que nos obrigarán a repensar a nosa relación co planeta, coas persoas ás que queremos e coa tecnoloxía.
Os ecos do lume é a viaxe iniciática dunha adolescente de doce anos que olla o mundo a través do móbil. Porén, a súa pasividade terá que dar paso a unha nova actitude se de verdade quere salvar a terra na que vive, o seu irmán e a si mesma.
Como Alicia no país das marabillas, a moza protagonista meteranos por un buraco a través do cal observaremos a realidade máis aló das aparencias. Descubrirá que, ás veces, a diferenza depende do punto de vista, e que os monstros podemos ser nós, e non os demais. Con ela e os habitantes introterrestres cruzaremos ao outro lado do espello para comprender que o universo no que vivimos é unha arañeira onde todos os seres estamos conectados.

Álex Mene

______________________________

GÁLIX aporta cada mes unha recensión feita por algún socio para a sección Este libro encantoume da OEPLI, ao igual que o resto de seccións. Todos os meses poderás ver as recomendacións das seccións aquí, na web da OEPLI e as de GÁLIX, ademais, no noso blog (bota un ollo na barra lateral!). Se queres colaborar coas túas recensións para esta sección, non dubides en nos contactar.

Máis nesta categoría este libro encantoume LIXGA OEPLI