A
Asociación Galega para o Libro Infantil e Xuvenil, GÁLIX, decidiu
propoñer a escritora galega Fina Casalderrey para o Premio Internacional Hans Christian Andersen considerado o Nobel da
literatura infantoxuvenil. Deseguido a directiva da OEPLI
(Organización Española para o Libro Infantil e Xuvenil), logo de
valorar as diferentes propostas das catro seccións de España do
IBBY, por unanimidade tomou a decisión de presentar á convocatoria
de 2024 a Fina Casalderrey na modalidade de creadora literaria e a
Elena Odriozola na modalidade de ilustradora.
A escritora pontevedresa Fina Casalderrey é unha das grandes referencias da literatura infantil española. O Premio Hans Christian Andersen é o máis alto recoñecemento internacional que se concede a un autor/a vivo/a neste xénero. O galardón concédeo a Organización Internacional para o Libro Xuvenil (IBBY) dende o ano 1956 a partir das propostas que realizan as propias seccións nacionais.
O
fallo do xurado farase público na Feira do Libro Infantil de Boloña
en 2024. A entrega dos premios realizarase no marco do 39 Congreso
Internacional de IBBY, que se celebrará en Trieste (Italia) do 30 de
agosto ao 1 de setembro de 2024.
O xurado internacional está integrado por Evelyn Arizpe (México/UK), Brenda Dales (USA), Sabine Fuchs (Austria), Diana Laura Kovach (Arxentina), Shereeh Kreidieh (Líbano), Bettina Kümmerling-Meibauer (Alemaña), Jaana Pesonen (Finlandia), Tan Fengxia (China), Pavle Uakar (Eslovenia) e Morgane Vasta (Francia), xunto coa directora executiva de IBBY, Carolina Ballester, como membro do xurado ex officio.
