Este libro encantoume (febreiro 2019)

Publicado por GÁLIX | 5.2.19 Deixa un comentario

FEBREIRO, 2019

Recomendamos Fóra do normal,  de María Reimóndez.






 André é un adolescente que vive angustiado por un corpo que non sente como seu. Digamos que a súa identidade oficial non encaixa coa real.

Rexeitado polo seu pai que non foi quen de acéptalo como é, e obxecto de burlas e agresións constantes no Instituto, vai sobrevivindo co único apoio da súa nai e dos referentes que lle proporcionan os seus cómics e heroes favoritos.
Semella non haber solución, pero a súa vida vai dar un xiro cando unha nova alumna, chegada da aldea, Mucha das Anzas, se converte na súa compañeira de pupitre. Nun primeiro momento, André, afeito aos abusos, séntese intimidado polo seu físico e pola súa actitude desafiante. Mais esta rapaza, gorda, desaliñada, que di o que pensa sen filtros, que non é “politicamente correcta” e que por riba vén do rural, non só non se sente fóra de lugar, senón que acepta con naturalidade a realidade de André. Entre eles vaise trabando unha amizade á que axiña se incorporan Xela e Martín, o que fora un dos seus acosadores, cadaquén  coa súa historia pasada o os seus propios conflitos. Co coñecemento mutuo e coa confrontación de cadansúas realidades vaise tecendo unha rede de afectos que será determinante para que André perda o medo a ser quen é e poida definirse á fin como adolescente trans.
Fóra do normal é boa literatura, máis tamén amosa unha forte vontade de contribuír á transformación da sociedade,  manifesta  xa dende a propia dedicatoria “Para todas as persoas mozas que vos negades a ser expulsadas ás marxes, porque en vós aniña un futuro sen caixas en que encerrar a cadaquén, para que nunca vos falte a coraxe de ser quen sodes.” Reimóndez  cre na capacidade da literatura para aprendérmonos a pensar, para axitar conciencias, para mudar referentes,  para insinuar camiños. 
A transfobia mais tamén o sexismo, o acoso, a situación da lingua galega están presentes no relato, no contexto e nas crenzas e comportamentos das/os personaxes aínda que  sempre atopan o seu contrapunto noutras ideas e condutas: a aceptación e valoración da diversidade, o coñecemento ,  a  amizade, o respecto o feminismo como anversos e reversos que axudan a quen está a ler a cuestionar uns e a construír outros referentes. Pero tamén elabora con moita mestría un relato terapéutico, balsámico, que pode ser libro de cabeceira para aqueles  e aquelas que coma o noso protagonista sofren, están confusos, en soidade. 
Ben con pinceladas ou con maior profundidade describe, con habilidade, contorna e personaxes. Unha  contorna adversa que ben recoñecemos e que despraza as persoas diferentes á periferia da sociedade e  uns personaxes cos que resulta moi  fácil empatizar.  Ademais de André, o protagonista e narrador da historia, destaca a personaxe de Mucha, que funciona como catalizadora dos cambios de André e do resto do grupo. É unha personaxe lúcida, afastada de estereotipos e complexos, que coa súa naturalidade e franqueza salvaxes achega ademais un contrapunto de humor ao relato: “Xa sabes que é un home sen pirola. Un tipo xenial”.
Cabe salientar o uso que a autora fai dos súper heroes e súper heroínas do universo da banda deseñada como fío condutor do relato e da evolución psicolóxica do protagonista. Un recurso central no texto e todo un acerto.  Á fin e ao cabo André é un heroe, “a quen non lle fan falla nin leotardos, nin disfraces de morcego, nin mutacións para entender que o maior acto de heroísmo para moitas persoas é, simplemente, contra vento e marea, ser”.
Oficio literario e compromiso social, unha vez máis, nesta nova obra de María Reimóndez, galardoada co ben merecido I Premio Agustín Fernández Paz de Narrativa Infantil e Xuvenil pola igualdade.
Grazas, María, por este libro tan necesario



Elena Pernas Lázaro

______________________________
GÁLIX aporta cada mes unha reseña feita por algún socio para a sección Este libro encantoume da OEPLI, ao igual que o resto de seccións. Todos os meses poderás ver as recomendacións das seccións aquí, na web da OEPLI e as de GÁLIX, ademais, no noso blog (bota un ollo na barra lateral!). Se queres colaborar coas túas reseñas para esta sección, non dubides en nos contactar.

Publicación máis recente Publicación máis antiga

0 comentarios:

[Comentario blog]