Este libro encantoume! (abril 2021)

 ABRIL 2021
Recomendamos: Antía e Daren. O misterio dos torques roubados de Valentín Alvite.

 

 

"Antía e Daren. O misterio dos torques roubados" é unha novela prepandémica cargada de retranca que desprega enerxía positiva e simpatía dende as primeiras liñas, de tal xeito que establece un código de empatía que axiña conecta co lectorado. Tiven a oportunidade de gozala como xurado do Premio Raíña Lupa de Literatura Infantil e Xuvenil 2019,

mais revisala e lela dunha sentada neste contexto espazo-temporal, onde o sentido do humor é un ben escaso a preservar, resultoume moi gratificante. Mentres ía pasando as páxinas tiña a impresión de atoparme diante das viñetas dun cómic de corte humorístico, escrito cunha linguaxe intencionadamente repetitiva, cuns diálogos áxiles ao servizo duns personaxes extravagantes, estrambóticos e estrafalarios que se moven polo espazo imaxinario de Uz "unha vila de escasa extensión formada por casas de escasa altura con hortas de escasa superficie poboadas de árbores de escasa froita", cun argumento de corte policial na pescuda da desaparición duns torques de gran valor arqueolóxico.

O libro encantoume e recomendo a súa lectura a quen desexe esquecer que un virus aciago nos impide relacionarnos de forma natural, mais co convencemento de que sempre hai un libro amigo que ten o poder de enchernos de alborozo. Debo agradecer a Valentín Alvite, autor do texto, e tamén a Miguel Porto, autor das acaídas ilustracións, que conseguisen debuxar nos meus beizos un sorriso que se mantivo presente no meu ánimo ata moito despois de pechar a última páxina.

An Alfaya

______________________________

GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.

Máis nesta categoría An Alfaya este libro encantoume OEPLI