Este libro encantoume! (maio 2021)

Publicado por GÁLIX | 3.5.21 Deixa un comentario

 MAIO 2021


 

Recomendamos: Unha estrela para Amina de Celia Díaz Núñez.

 

 

 

Amina, unha nena soñadora, mais tamén triste, é a protagonista desta peza teatral de Celia Díaz, que vén avalada por ter recibido o Premio O Facho de Teatro en 2019.

Amina, como dicía, é unha nena e todas as nenas a un tempo, pois nela conflúen todas as nenas do mundo, dende Líbano ata EEUU. Para ser Amina só hai que ser unha refuxiada e vivir entre arames de espiños. Comparte escena coa súa boneca Sally que cobra vida para facerlle ver a realidade. Sally, a pesares de ser unha boneca, está máis no mundo real que Amina, que se nega ou non quere comprender. É a boneca a que di “construíron un muro moi alto, vixiado por soldados armados que dispararán se nos atrevemos a cruzalo” e Amina contesta nun berro “ Iso non é certo! Es unha boneca mentireira!”. Porén, a medida que avanza a historia, Sally vai entrando no mundo de evasión de Amina e promételle que volverá espertar cada mañá escoitando os rechouchíos dos paxaros aniñados nun baobab.

O espazo escénico amósanos un campamento de refuxiados nunha noite estrelada, onde Amina, incapaz de durmir ou quizais soñando, imaxina fermosas historias. Unha pantalla, ao fondo da escena, axúdalle ao público a entrar na mente de Amina e faino partícipe dos seus desexos e dos seus medos. Completan a peza as cancións tiradas do folclore de distintos países que as protagonistas cantan e bailan e que nos fan lembrar que Amina é unha nena.

Este libro encantoume porque é unha historia tenra ao mesmo tempo que dura, e obríganos a ver unha realidade que preferimos ignorar, como se non fose con nós.

Raquel Castro




______________________________

GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.

Publicación máis recente Publicación máis antiga

0 comentarios:

[Comentario blog]