FEBREIRO 2020
Recomendamos: Lúa en Ningures de Beatriz Maceda
Unha historia conmovedora no
sentido etimolóxico da palabra, porque nos fai reaccionar e
empatizar coas sensacións que experimentan os millóns de persoas
que “sobreviven” nos campos de refuxiados.
Lúa,
a nena protagonista, será os nosos ollos, os nosos oídos e ata o
noso corazón nesa terra de ninguén, e ao mesmo tempo de todos, que
é Ningures. Con ela iremos descubrindo a realidade dunha existencia
gris, que só as nenas e nenos son quen de encher de cor ao careceren
da bagaxe vital que, en demasiadas ocasións, constrúe camiños cara
á desesperanza.
A
Lúa, e mais a todas as rapazas e rapaces que viven en Ningures,
roubáronlle o dereito a gozar dunha infancia que xa non vai poder
recuperar. Viuse na obriga de medrar de golpe para tratar de entender
o que agochan as miradas baleiras da súa familia e o significado de
certas palabras que non deberían formar parte do seu vocabulario
cotián. A sensación de perda pesa coma unha lousa, pero non se
trata dun padecemento pola privación dos bens materiais, senón do
sufrimento que provocan a incerteza e os afectos que deixou atrás…
a Lúa arrincárona dos brazos do avó, da terra de seu, do mundo que
coñecía dun día para outro e, coma a ela, ás restantes nenas e
nenos. Imán, outra nena de Ningures, achégalle a enerxía que
precisa para superar o impacto que lle produce chegar a un
“campamento que só ulía a desesperanza”, tal e como a propia
Lúa afirma no texto. A enfermidade, a morte, e os testemuños
doutras rapazas e rapaces crean lazos de solidariedade indestrutibles
entre os máis pequenos nese mundo cruel, en que a literatura logra
que se levanten cada vez que caen grazas á forza das palabras d’O
Principiño, que o avó de Lúa lle regala, e a crearen unha
pequena editorial para lles levar aos demais nenos do campamento a
ilusión e a alegría de vivir a través dos libros.
Moi
recomendable a lectura desta necesaria e magnífica obra de Beatriz
Maceda, que atopa, nas suxestivas e atractivas ilustracións de Laura
Veleiro, o complemento perfecto.
Irene
Penas
______________________________
GÁLIX
aporta cada mes unha
reseña feita por algún socio para a sección Este
libro encantoume da
OEPLI,
ao igual que o resto de seccións. Todos os meses poderás ver as
recomendacións das seccións
aquí,
na web da OEPLI e as de GÁLIX, ademais, no
noso blog (bota un
ollo na barra lateral!). Se queres colaborar
coas túas reseñas para esta sección, non dubides en nos
contactar.
0 comentarios:
[Comentario blog]