Este libro encantoume (marzo 2018)

Publicado por GÁLIX | 7.3.18 Deixa un comentario

MARZO, 2018

Recomendamos: Un máis, de Olalla González.

Cando un membro máis vai chegar á familia sempre suscita interrogantes. Isto foi o que lle pasaou ao pequeno coello cando se enterou de que mamá coella ía ter un bebé.
A partir dese momento o pequeno coello quere saber cando nacerá.
Olalla González e Marc Taeger van tecendo unha tenra historia que temporalmente abarca a espera do novo bebé. O pequeno coello condúcenos por unha estructura repetitiva con tres puntos referenciais: as reiteradas preguntas que lle vai facendo a súa nai de cando nacerá, da que sempre recibe a mesma resposta; por outro lado o anuncio aos outros animais do bosque de que vai ter un irmán ou unha irmá e aos que tamén interroga coa súa pregunta de cando nacerá. A terceira referencia son as súas ensoñacións, a modo paréntese ou aposición gráfica, de todo o que ha suceder cando teña un irmán ou unha irmá.
Por fin mamá coella chega ao final da espera e danos unha gran sorpresa!
Desde o punto de vista gráfico hai que salientar o tratamento das gardas que nos introducen nun inmenso campo no que se vai desenvolver a historia e que se repite na dobre páxina seguinte, para rematar o álbum co mesmo efecto gráfico, o que lle da un carácter circular á narración gráfica.
Xa na portada nos presenta ao pequeno coello, cun sorriso, mirándonos atentamente, coas súas grandes orellas e con medio corpo afundido na herba. Na última páxina aparece unha imaxe similar do pequeno coello, pero moi ben acompañado, tamén mirándonos e aquí con cara de sorpresa.
Os fondos, polo feito de ser brancos, contribúen a que as figuras silueteadas con quebradizo trazo negro, adquiran protagonismo.
Álbum moi interesante para traballar os valores: a amizade, a solidariedade, a xenerosidade...
Extraordinaria proposta para compartir pequenos e adultos.

Ángeles Roca López
______________________________
GÁLIX aporta cada mes unha reseña feita por algún socio para a sección Este libro encantoume da OEPLI, ao igual que o resto de seccións. Todos os meses poderás ver as recomendacións das seccións aquí, na web da OEPLI e as de GÁLIX, ademais, no noso blog (bota un ollo na barra lateral!). Se queres colaborar coas túas reseñas para esta sección, non dubides en nos contactar.

Publicación máis recente Publicación máis antiga

0 comentarios:

[Comentario blog]