O blog de GÁLIX

O Lazarillo é o concurso máis antigo en Literatura Infantil e Xuvenil, que se vén celebrando desde o 1958.

Convocado nas súas primeiras edicións polo extinto Instituto Nacional del Libro Español, desde 1986 ven sendo a OEPLI, e as súas seccións territoriais GÁLIX, Galtzagorri, CIBBYCat e Consejo General del Libro, a encargada da convocatoria do premio.

O certame conta co patrocinio do Ministerio de Educación, Cultura e Deporte e de MacDonald’s

O premio Lazarillo convócase nas modalidades de “Álbum Infantil e Xuvenil Ilustrado” e “Creación literaria”.


 

ACCESO ÁS BASES DE CREACIÓN LITERARIA

  • Para obras orixinais e inéditas.

  • Escritas en calquera das linguas oficiais do estado.

  • En calquera xénero literario (narrativa, poesía ou teatro)

  • Destinadas ao lectorado xuvenil, maior de 12 anos.

  • O premio ten unha dotación de 6000€.

  • O prazo de entrega remata o 30 de xullo de 2025.

ACCESO ÁS BASES DE ÁLBUM INFANTIL E XUVENIL ILUSTRADO

  • Para obras orixinais e inéditas.

  • Destinadas ao público infantil ou xuvenil.

  • Formato máximo, DIN A-2.

  • Extensión máxima de 32 páxinas.

  • Cunha dotación de 6.000€

  • O prazo de entrega remata o 30 de setembro de 2025.


Os xurados emitirán os veredictos no mes de decembro de 2025 e a proclamación e máis a entrega dos premios terá lugar no primeiro trimestre de 2026.

 

Vén de publicarse o catálogo que cada ano elaboramos na OEPLI as catro seccións de ámbito lingüístico que a conforman, nas que están representados todos os sectores do mundo do libro, da creación e da mediación: escrita, ilustración, edición, librerías, bibliotecas, crítica, ensino, etc. que valoraron cada un dos títulos seleccionados.

No catálogo LITERATURA INFANTIL E XUVENIL ESPAÑOLA. Selección OEPLI 2024, recollemos unha selección bibliográfica dos mellores libros infantís e xuvenís publicados no ano 2024 nas catro linguas representadas na OEPLI polas seccións: GÁLIX, IBBYCat, Galtzagorri e Consejo. Son obras que obedecen a criterios de calidade e idoneidade, o que as fai merecedoras de formar parte desta lista de honra por seren consideradas significativas dentro da gran produción existente.

O catálogo está dispoñible nos espazos web de GÁLIX:

 

 

 

 


Xuño 2025

Recomendamos Os ecos do vento de Antonio García Teijeiro

 

 

 

Cando Os ecos do vento chegou ás miñas mans intuín que me atopaba ante un atinado agasallo para a cativada lectora. O suxestivo título deste poemario de Antonio García Teijeiro, unido á máxica ilustración que Noemí Villamuza elixiu para a portada, convidaban a ceibar o noso maxín, a descubrir outros mundos, outros tempos, outras voces. Como fai saber o propio autor no poema introdutorio desta obra incluída na Colección Poesía Ilustrada da Editorial Kalandraka, o libro está tecido “cun monllo de poemas como homenaxe a toda esa beleza que me leva emocionando dende hai tempo”.


A primeira composición, inspirada en Juana de Ibarbourou, poeta uruguaia de orixe galega, anuncia os poemas posteriores e inclúe o verso que titula o libro: “E cantan calando/ E calan cantando/ os ecos do vento/ nas noites de maio” (en alusión aos paxaros). A partir de aí, a través destas páxinas somos quen de abrir as fiestras de poetas coma Gabriela Mistral, que nos invita a pairar coa nena andoriña que “voaba no deserto/ confundida, despistada/ polas liñas do incerto”. Ou de Laura Devetach, mestra rural e xornalista cuxos libros foron prohibidos durante a ditadura arxentina, que nos fai perseguir “unha vella moi velliña/ (que) corre pola rúa/ tras dunha mazá”.

Este mesmo exercicio, en parte literatura, en parte pedagoxía, rende homenaxe a poetas que merecen pasar á historia das letras coma referentes: María Cristina Ramos, Mercedes Calvo, María Elena Walsh, María José Ferrada, Cecilia Pisos, Beatriz Giménez de Ory, María Teresa Andruetto ou Gloria Fuertes. A nosa Rosalía non podía faltar a esta cita de versos que brúan nos ecos do vento, desta volta vestida coma “unha moza namorada/ que quere fuxir do inverno”.

Un libro moi recomendábel para convidar o público infantil a descubrir a poesía a través de diálogos fermosamente ilustrados con mulleres poetas cuxa vida e obra desprenden inspiración. Un poemario luminoso, feminino, musical. Poesía necesaria.

Claudia Castro



GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.

 

Chegaron á Biblioteca de GÁLIX, como doazón da editorial, as novidades de Kalandraka:

  • Dez coelliños

  • A festa dos animais

  • Unha eiruga moi larpeira

 

 

 


Título: Dez coelliños

Autor: Maurice Sendak

Tradución: Iago Nicolás

Editorial: Kalandraka

Colección: Tras os montes

+ info: https://kalandraka.com/dez-coellinhos-galego.html




Título: A festa dos animais  
Autor: Marcos Farina

Tradución: Iago Nicolás

Editorial: Kalandraka

Colección: Acartonados

+ info: https://kalandraka.com/a-festa-dos-animais-galego.html






Título: Unha eiruga moi larpeira

Autor: Eric Carle

Tradución: Chema Heras e Pilar Martínez

Editorial: Kalandraka

Colección: Tras os montes (Libro emerxente)

+ info: https://kalandraka.com/unha-eiruga-moi-larpeira-libro-pop-up-galego.html

 


Centro Dramático Galego en coprodución con Os Monicreques de Kukas porá en escena O carteiro de Ximaraos de Carlos Labraña, obra gañadora da edición número trece do premio Manuel María de literatura dramática infantil, convocado pola Axencia Galega das Industrias Culturais da Xunta de Galicia .

A obra, que trata -xogando coa realidade e a fantasía- a situación das crianzas que conviven cunha persoa afectada de alzhéimer, estará no Salón Teatro de Santiago de Compostela os días 28, 29 2 30 de maio.