Os membros do xurado do 1º Premio ao Libro Informativo para a Rapazada convocado por GÁLIX, destacaron a alta calidade e rigorosidade das propostas presentadas.
Logo de valorar e deliberar sobre diversos aspectos contemplados nas bases do certame, declaran como gañadora a obra presentada baixo o título:
Ferramentas básicas para ser artista da que resultou ser autora Blanca Millán.
Este certame, dirixido a premiar proxectos de libro informativo para lectorado infantil e xuvenil, é a primeira vez que se convoca en Galicia e responde ás necesidades expresadas dende a mediación e a docencia para cubrir unha grave carencia de textos informativos de calidade feitos en Galicia e en galego.
Sobre a obra premiada, o xurado destaca a destreza na composición das páxinas e na claridade das ilustracións que se complementan con textos de rigor científico e o dinamismo das personaxes que van guiando, de xeito sinxelo, ao lectorado ao que vai dirixido.
Por último GÁLIX confía en que o certame sexa o xerme da creación de obras similares que esperten a curiosidade das novas xeracións.
