Presencia de GÁLIX no Culturgal 2019

GÁLIX estivo esta fin de semana no Culturgal, feira na que se dan cita todas as empresas e asociacións que traballan no eido cultural en Galicia. 
 

Coma en anteriores ocasións, milleiros de persoas asistiron a este encontro para coñecer que se está a facer en Galicia en galego.

A Asociación Galega do Libro Infantil e Xuvenil (GÁLIX), que traballa na promoción e divulgación da literatura infantil e xuvenil galega, non podía faltar a este evento.

O domingo, 1 de decembro, presentamos a asociación no Espazo Foro:

Xosé Antonio Perozo, falou da súa historia e a súa estrutura; Pilar Sampedro explicou as súas funcións e deu conta das súas actividades e dos materiais e recursos da asociación en formato físico e dixital; Antonio Seijas, centrou a súa alocución traballo de GÁLIX no campo da ilustración e na defensa da autoría das ilustradoras e ilustradores.

Xa ao mediodía, Carmen Fouces, Concelleira de Cultura de Pontevedra, e Xosé A. Perozo, presidente de GÁLIX, presentaron o cartaz gañador do III Premio Internacional de Ilustración, que será a imaxe do XXI Salón Internacional do Libro Infantil e Xuvenil de Pontevedra.

Fixeron entrega do galardón á gañadora do certame, Susana Suniaga, e presentaron as imaxes finalistas que formarán parte do almanaque do Salón do Libro 2020.