Este libro encantoume (novembro 2019)

Novembro 2019

Recomendamos: Pioneiras 2: galegas que abriron camiño de Anaír Rodríguez con ilustracións de Abi Castillo

Encantoume Pioneiras 2, porque ao igual que o precedente libro Pioneiras editado no pasado ano , é un libro necesario, que informa cunha linguaxe sinxela pero moi atinada, suxerinte e poética, da vida de once mulleres que foron quen de saír dos roles que a sociedade agardaba delas para introducirse en novas áreas de traballo ou de lecer que ata ese momento estaban reservadas aos homes.

A autora procura de novo aportar referentes femininos valorados socialmente, diversos e non estereotipados, historias de mulleres valentes, valiosas polo que conseguiron facer e non polo seu físico, que contribúan a ofrecer unha imaxe poderosa da muller, con demasiada frecuencia sometida a papeis secundarios.

Nesta segunda entrega de Pioneiras atópanse quizá nomes menos coñecidos que na primeira, case todos do século XX, mais igualmente apaixonantes e que sen dúbida poderían dar lugar a interesantes películas:

Antonia Ferrín: a primeira galega profesora universitaria de matemáticas e a primeira astrónoma.

Rita Fernández Queimadelos: a primeira arquitecta galega e a primeira en España en asinar proxectos propios.

Antonia Sanjurjo: promotora da práctica deportiva feminina.

Mercedes Mariño: a primeira actriz galega en escenarios americanos.

Ángela Ruiz Robles: a inventora do primeiro libro electrónico; na súa Enciclopedia mecánica xa prevía a lectura de diferentes maneiras, con luz, son, pantalla para escribir e ata lente de aumento.

Elisa Patiño: a primeira aeronauta.

Concepción Pérez Iglesias: a primeira alcaldesa galega e a segunda de España.

María Barbeito: pioneira da renovación pedagóxica, promotora dunha escola gratuíta, aberta e creativa.

Josefina García: a inventora dun dos primeiros traxes de auga para as xentes do mar.

Manuela Barreiro Pico: a primeira galega que cursa bacharelato e a primeira muller que se licencia na universidade compostelá, no ano 1901.

María Cardarelly: a primeira fotógrafa con estudo propio.

Este conxunto de pioneiras mostra o moito que ten cambiado a situación da muller neste último século, en Galicia e no mundo.

Considero que é moi importante que as novas xeracións teñan coñecemento deste relevante e recente cambio histórico, que sexan conscientes de que ata hai ben pouco eran moitísimas as cousas que unha muller non podía facer, tanto polo que ten de conquista respecto da que non se debe baixar a garda, como polo exemplo que ofrecen para seguir cambiando o mundo e conquistando dereitos.

Contribúe a que poidamos gozar plenamente deste libro unha coidada edición, en tapa dura, con fermosas e coloridas ilustracións, acaídas ao texto.

Pilar Sampil

___________________________

GÁLIX aporta cada mes unha reseña feita por algún socio para a sección Este libro encantoume da OEPLI, ao igual que o resto de seccións. Todos os meses poderás ver as recomendacións das seccións aquí, na web da OEPLI e as de GÁLIX, ademais, no noso blog (bota un ollo na barra lateral!). Se queres colaborar coas túas reseñas para esta sección, non dubides en nos contactar.