Bo Nadal!

Cos nosos mellores desexos para estas festas, 

Bo Nadal e un ventureiro 2017.

Acto de nomeamento de Marifé Quesada como Socia de Honra de GÁLIX 2016

O pasado luns día 12 de decembro celebramos no IES Valadares (Vigo) o nomeamento como Socia de Honra da GÁLIX de Marifé Quesada, primeira ilustradora en acadar este recoñecemento.

GÁLIX agasallou aos asistentes cun díptico numerado cunha ilustración de Marifé Quesada acompañada por palabras de María Xosé Queizán.

Tras unha breve benvida por parte do presidente de GÁLIX, Xosé Antonio Perozo, o acto comezou cunha proxección de diapositivas con ilustracións da nova Socia de Honra. A continuación o númeroso público que participou no acto puido gozar da marabillosa laudatio lida pola escritora María Xosé Queizán, así como da réplica emocionada da homenaxeada.

Tras o intercambio de agasallos entre o IES Valadares e Marifé, o acto finalizou coas palabras da directora do centro, Eva López Tarrío, e da concelleira de Educación do Concello de Vigo, Olga Alonso.

    

Marifé Quesada nomeada Socia de Honra de GÁLIX

A xunta directiva de GÁLIX decidiu por unanimidade nomear Socia de Honra 2016 á ilustradora Mª Fe Quesada.
A entrega do galardón terá lugar o vindeiro luns, día 12 de decembro, ás 12 h. nun acto escolar aberto ao público no IES Valadares (Vigo).

A escritora María Xosé Queizán lerá a laudatio. Despois procederase á proxección dos traballos da galardoada e o alumnado asistente ao acto poderá, ademais de manter un coloquio coa ilustradora, recibir un gravado numerado e asinado por ela, feita para esta ocasión. Logo da resposta da homenaxeada á laudatio, o presidente de GÁLIX fará entrega da escultura deseño de Noemí López, que acredita o nomeamento.

Nas anteriores edicións recibiron esta mesma distinción Xavier Senín, Xosé Neira Vilas, Agustín Fernández Paz, Fina Casalderrey, Xoán Babarro e Helena Villar Janeiro.

Novas da LIX (7)

Deixamos atrás novembro e entramos no mes de nadal coas últimas novas e unha recopilación mensual de novas do blog, ademais dunha novidade na nosa web, xa que, grazas ao convenio de prácticas coa Universidade de Vigo, agora a maioría das páxinas estáticas de galix.gal poden consultarse en castelán, inglés e francés.

Feliz mes!

Novas:

• Ramón Nicolás fala en Caderno da Crítica de Do re mi fantasía, de Concha Blanco, aquí. [Ficha do libro en Editorial Bolanda]
• Conferencias do Simposio "10 años de LIJ" - Noticias Gretel: Ao longo de10 anos, recoñecidos profesionais do ámbito da LIX grabaron conferencias para o máster; agora estas conferencias ofrécense en aberto para proveito de todos. Neste enlace podes acceder aos discursos de Teresa colomer, Brenda Bellorín, Álvaro Marchesi, Ana María Machado, Antonio Basanta, Clara Budnick, Daniel Goldin, Elisa Bonilla, Emilia Ferreiro, etc.

Máis de novembro no blog de GÁLIX:

• Novidades editoriais para a nosa biblioteca: recibimos obras de Kalandraka (I) e (II), de Galaxia, os gañadores dos Premios Xerais 2016 e Sushi Books. Preme nos enlaces para saber máis!
• Celebramos a xornada propia Desfacendo a raia, en Santiago, todo un éxito do que compañeiros e participantes compartiron impresións no twitter e facebook.
• Informamos de varios premios, como dos candidatos aos Andersen 2018 e os gañadores do Lazarillo, Nacional de Cómic, de AGADIC e os María Moliner a campañas de animación á lectura.
• E, por suposto, enviamos a reseña de novembro para a sección Este libro encantoume!, da OEPLI: Poemas birollos para ler cos ollos, de Fran Alonso.

Na nosa biblioteca (35)

Rematamos o mes coas últimas novidades de Kalandraka!:

Título: Canta connosco!
Texto: María Campos e Carlos Yus
Música:  Migallas
Ilustracións: Óscar Villán
Editorial: Kalandraka

*Edición especial 20 anos: CD + DVD e karaoke.

Título: Inventario das aves
Texto: Virginie Aladjidi
Ilustracións: Emmanuelle Tchoukriel
Tradución: Fernando Moreiras
Editorial: Faktoría k de libros - Kalandraka

Título: Unha última carta
Texto: Antonis Papatheodoulou
Ilustracións: Iris Samartzi
Tradución: Manuela Rodríguez
Editorial: Kalandraka

*IX Premio Internacional Compostela de Álbums Ilustrados. Enlace á nova da entrega do premio aquí.

Na nosa biblioteca (34)

Dende Sushi Books chéganos á biblioteca de GÁLIX a continuación das aventuras da protagonista de A lenda de Sally Jones (que che presentamos aquí):

Título: O mono do asasino
Texto e Ilustracións: Jacob Wegelius
Tradución: a partir da vesrsión castelá, Moisés Barcia
Editorial: Sushi Books

* Obra premiada polo Consello Nórdico na categoría de Libro Infantil e Xuvenil.

Na nosa biblioteca (33)

Este mes foron moitas as novidades chegadas dende a Editorial Galaxia á nosa biblioteca. Aquí tes toda a información:

Título: Os Cabezombis na Mansión Espello
Texto: Patricia Mallo
Ilustracións: Perrilla
Editorial: Galaxia
Colección: Árbore, a partir dos 10 anos

Título: Versos da tarde laranxa
Texto: Ana Mª Fernández
Ilustracións: María Ruiz Castelain
Editorial: Galaxia
Colección: Árbore, a partir dos 8 anos

Título: Nunca mascotas
Texto: Paula Carballeira
Editorial: Galaxia
Colección: Costa Oeste

* Presentación do libro Nunca Mascotas na libraría Andel de Vigo o 29/11/2016, ás 20:00h. Recital poético-musical de Paula Carballeira, acompañada do músico Suso Cortegoso.

Título: Alén da aventura
Texto: Carlos Vila Sexto
Ilustracións: Roberto Vila Rodríguez
Edición: 2ª edición.
Editorial: Galaxia
Colección: Árbore

* V Premio Rúa Nova de Narracións Xuvenís

Título: O noso samaín
Texto: Loretta Birott Bermejo
Ilustracións: Nuria Valdeón Balsas
Editorial: Galaxia

* Entrevista coa autora en Faro de Vigo por Ana Baena

Novas de LIX - Premios de novembro

Este mes foron varios os premios e honras recibidos no eido da LIX. Por se vos perdestes algún, aquí vos quedan os enlaces a toda a información:

LAZARILLO
Carles Cano gaña o Premio Lazarillo de Creación Literaria 2016
Ana González e Kike Ibáñez gañan o Premio Lazarillo de Álbum Ilustrado 2016

CÓMIC
Pablo Auladell gañou o Premio Nacional de Cómic 2016 (+info sobre Pablo Auladell neste enlace)

TEATRO
Entregáronse tamén os premios de literatura dramática que convoca AGADIC e os gañadores son, do IX Manuel María de literatura dramática infantil, Carlos Labraña, por 'O valo', e do XIII Barriga Verde de textos para teatro de monicreques (modalidade infantil) Ignacio Vilariño, por 'Os golfiños e o xigante'. (+info)

MARÍA MOLINER
As bibliotecas de concellos de menos de 50.000 habitantes participaron nesta campaña de animación la lectura. En Galicia, as bibliotecas galardoadas foron as de Ares, Bergondo, Carballo, Culleredo, Miño, Oleiros, Ortigueira, Rianxo e Sada na Coruña; O Saviñao, Sober e Xermade en Lugo; Pereiro de Aguiar e Verín en Ourense, e O Grove, A Guarda, Moaña, Mos, O Porriño, Redondela, Soutomaior e Vilagarcía de Arousa en Pontevedra. Velaquí todas as bibliotecas premiadas.

Xornadas GÁLIX - Desfacendo a raia

A vindeira semana temos o pracer de celebrar, un ano máis, o acto propio de GÁLIX.

Nesta ocasión, ofrecémosvos as Xornadas DESFACENDO A RAIA, que terán lugar o venres 25 e o sábado 26 de novembro de 2016.

Vealquí toda a información sobre o evento:

DESFACENDO A RAIA

Lugar: Galería Sargadelos de Santiago de Compostela (Rúa Nova, 16)
Data: Venres 25 de novembro e sábado 26 de novembro

Contidos das sesións:

25/11/16
Sesión de mañá
10:30 Recepción e inauguración por parte do presidente de GÁLIX, Xosé A. Perozo.

11:00 - 12:00 Sesión de Contacontos con Alicia López (escritora e creadora dos Obradoiros de escrita en Santiago de Compostela)
Asistencia do alumnado do CEIP Monte dos Postes (Santiago de Compostela).

12:00 - 12:30 Pausa café

12:30 - 13:30 "A importancia de desfacer a raia". Conferencia inaugural a cargo de Eli Ríos (escritora e crítica literaria de A Sega).


Sesión de tarde
16:30 - 18:00 "Desfacendo a raia na escola" (mesa redonda)
Modera: Pilar Sampedro (docente)
Rocío Candales (profesora de Infantil no CEIP Apóstolo Santiago-Santiago de Compostela)
Valentina Formoso (profesora de Secundaria no IES Félix Muriel-Rianxo)

18:00 - 18:30 Pausa café

18:30 - 20:00 "Desfacendo a raia na escrita e na ilustración"  (mesa redonda)
Modera: Antía Marante (investigadora e crítica literaria)
Ilustración: Joana Estrela (ilustradora), Xosé Cobas (ilustrador)
Escrita: María Reimóndez (escritora), António José Gonçalves (escritor)

25/11/16
Sesión única de mañá
10:30 - 12:00 "Desfacendo a raia na edición e na crítica" (mesa redonda)
Modera: Montse Pena Presas (profesora USC)
Editoras: Helena Pérez (Edicións Xerais), Benedita Barros (Máquina de voar Editora)
Crítica: Carla Maia de Almeida (crítica literaria), Miguel Vázquez Freire (profesor e escritor)

12:00 - 12:30 Pausa café

12:30 - 13:30 Espectáculo musical con Uxía Senlle e Sérgio Tannus

13:30 - 14:00 Clausura


Non dubides en nos contactar se tes algunha pregunta.


Colaboran: OEPLI, Ministerio de Educación, Cultura e Deporte

Migallas presenta na Coruña o libro-disco Canta connosco!

Este sábado, 19 de novembro, ás 18:30, na libraría Moito Conto de A Coruña, Kalandraka e Migallas Teatro presentan Canta connosco!.

Cúmprense 20 anos do traballo discográfico orixinal, todo un revulsivo na música infantil en galego, que agora Kalandraka vén de publicar unha edición especial en formato libro-CD-DVD, ilustrado polo Premio Nacional Óscar Villán e con vídeos dirixidos por José Miguel Sagüillo.

Máis información na web de Migallas, na  web de Kalandraka e no seu evento de Facebook.

Na nosa biblioteca (32)

Chegan ás librarías, e á nosa biblioteca, os gañadores dos Premios Xerais 2016:

Título: Todo o tempo do mundo
Texto: David Pérez Iglesias
Ilustracións: Marcos Viso
Editorial: Xerais
Colección: Merlín

Premio Merlín de Literatura Infantil 2016

Título: Xa non estou aquí
Texto: Iria Misa
Ilustración da cuberta: Miguel A. Vigo:
Editorial: Xerais
Colección: Fóra de xogo

Premio Jules Verne de Literatura Xuvenil 2016

Reseña de Xa non estou aquí en Trafegando Ronseis aquí.

Na nosa biblioteca (31)

Comezamos coas estreas de libros neste mes de novembro con estas novas obras de Kalandraka:

Título: Míster Magnolia
Texto e Ilustracións: Quentin Blake
Tradución: Xosé Ballesteros
Editorial: Kalandraka
Colección: Tras os montes

Medalla Kate Greenaway (1980) e Premio Red House Children’s Book (1981)

Título: Janosch : 5 quebracabezas
Ilustracións: Janosch [Horst Ecker]
Editorial: Kalandraka
Colección: Tras os montes

Título: Un monstro vén a verme
Texto: Patrick Ness, baseada nunha idea orixinal de Siobhan Dowd.
Ilustración da cuberta: Jim Kay
Tradución do inglés: Xesús Fraga
Editorial: Faktoria K de libros - Kalandraka

Premio The Red House, Premio National Galaxy, Medalla Carnegie ao Mérito Literario e Medalla Kate Greenaway ao Mérito Artístico.

Candidatos aos Premios Andersen 2018

A OEPLI, en colaboración co Ministerio de Educación, Cultura e Deporte, vén de presentar as candidaturas de Alfredo Gómez Cerdá e Elena Odriozola ao Premio Hans Christian Andersen 2018.

Este premio, o máis alto recoñecemento internacional concedido a un autor vivo, é concedido polo IBBY dende 1956.

En xaneiro coñecerase a lista definitiva dos candidatos propostos por todas as seccións do IBBY.

Máis información na web do IBBY e nesta nota de prensa.

Este libro encantoume! (novembro)

Xa está dispoñible na web da OEPLI, neste enlace, a reseña de Poemas birollos para ler cos ollos, de Fran Alonso, o libro que recomendamos este mes para a sección "Este libro encantoume".

Consulta anteriores recomendacións seleccionando data, sección, autor ou editorial na web da OEPLI.

Novas da LIX (6)

Rematamos outubro con poucas novas para compartir con vós, pero queremos aproveitar para compartir non só unha entrevista ao noso socio e tesoureiro Antonio M.Fraga senón tamén para recopilar todas as entradas do blog deste mes e desexarvos un feliz outono! E feliz Samaín!

Novas:

• XIII Curso de Formación. A LIX. Relacións texto-imaxe. Obras imprescindibles para o ensino primario e secundario sobre a representación do mundo árabe na LIX, no Centro Ramón Piñeiro para a Investigación en Humanidades. Biblioteca Afundación os días 11, 12 e 18 de novembro.

Entrevistas:

• Entrevista a Antonio M. Fraga en Biosbardia.

Máis deste mes no blog de GÁLIX:

• Ciclo de Literatura Infantil e Xuvenil en Ourense.
• Novidades para a nosa biblioteca da man de Xerais, Kalandraka, Rodeira-Edebé, Sushi Books, Hércules Edicións, ademais do catálogo da obra de Agustín Fernández Paz a versión en papel da Guía Ninja do Ilustrador.
• Héctor Cajaraville gaña o 7º Premio Meiga Moira.
• Teño uns pés perfectos entra na selección White Ravens 2016.
• Presentación de A Árbore da Escola en Moito Conto.
• Celebración do Día da Biblioteca o 24 de outubro.

24 de outubro Día da Biblioteca

Por iniciativa da Asociación Española de Amigos del lIbro Infantil y Juvenil, desde 1997, en colaboración co Ministerio de Educación, Cultura e Deporte, celébrase o Día da Biblioteca, co obxectivo de concienciar á sociedade da importancia da lectura e como homenaxe e recoñecemento á labor dos/as bilbiotecarios/as.

Este ano, as autoras selecionadas para a redacción do pregón e o deseño do cartel que se difunde foron as gañadoras do Premio Nacional 2015, Ledicia Costas e Elena Odriozola.

Celebra con nós o Día da Biblioteca!

Velaquí o texto de Ledicia na súa versión galega.

Un vagalume é unha illa diminuta extraviada na noite máis densa. Cen vagalumes, unha constelación misteriosa que marca o rumbo cara a outros universos. Así, con esa estratexia de luz, organízanse os libros que moran nas bibliotecas. Son aloumiños fosforescentes que incendian os soños e recompoñen os corazóns grises ata facelos recobrar o seu vermello brillante. Calquera individuo que padeza a síndrome do corazón gris, debería poñerse en mans dun experto e visitar unha biblioteca. 

Para escribir un libro, ademais de facer malabarismos coas palabras hai que ser unha desvergonzada ou un tolo. Un atrevido, unha excéntrica descontrolada! Levar un calcetín de lunares, outro de raias e os pelos de punta. Unha crista como as das cacatúas sería un peiteado ben interesante para un escritor. Só as mentes máis disparatadas son aptas para escribir libros. Mais para custodialos non chega con ter un desaxuste nos cables cerebrais. É indispensable ser de fóra. Un extraterrestre. As bibliotecas albergan seres con antenas xiratorias, cerebros milliométricos que memorizan títulos rebuscados, rimbombantes, campanudos. As persoas que custodian os libros sempre me pareceron criaturas singulares. Están dotadas de extremidades retráctiles que estiran e estiran ata alcanzar aquel volume ao que semellaba imposible acceder. E logo, coma se nada, recompóñense e todo volve á súa posición natural. Semellan seres humanos, mais a pouco que os observes, percibirás que non son de aquí. Unha das cousas que máis me fascina é o seu cerebro. Parécenme tan listos! Os libros fabrican pensamentos. Pasar tantas horas dentro dunha factoría de ideas é bo para ter un corazón vermello e brillante e unha cabeza chea de plans fantásticos. 

Alguén me contou que o 24 de outubro é o Día das Bibliotecas. Sería xenial montar unha festa con confeti e pompas de xabón. Unha cousa grande. A min encantaríame vestirme para tal ocasión coma o personaxe dalgún libro, sentar na mesa dunha biblioteca da cidade onde vivo, e agardar a que viñesen visitarme. Nas bibliotecas podes ser quen ti queiras. Desde Mary Poppins ata Matilda. Atreyu, Drácula e ata Pippilotta Viktualia Rullgardina Krusmynta Efraimsdotter Långstrump. Podes poñer botas de pelo, plumas, zancos e sombreiros. Sombreiros! Iso é! Imaxino a unha pequena lectora achegándose a min discretamente, engaiolada polas cores e formas do meu chapeu:

—Sombrereira tola, que festa tan marabillosa! Sería tan amable de servirme unha taza de té?

Eu serviríalla con moito gusto, poñendo cara de muller refinada, e logo as dúas faríamos a un tempo ruído ao tragar. Soaría algo así como glup glup glup. E antes de que nos dese tempo de botarnos a rir de xeito desenfreado, aparecería o bibliotecario, como xurdido da nada, que para iso posúen a facultade de materializarse diante de ti no momento máis inoportuno, e nos advertiría de que as bibliotecas non son lugares aptos para ir merendar. Hai que recoñecer que son únicos custodiando tesouros. Extraterrestres co corazón vermello e brillante. Que cousa tan fantástica. Feliz Día das Bibliotecas!

Ledicia Costas

Presentación de A Árbore da Escola en Moito Conto, A Coruña

Mañá, mércores 19 de outubro, Antonio Sandoval presentará a súa nova obra, A árbore da escola. Será na libraría Moito Conto da Coruña a partir das 19:00 horas.

Trátase dun álbum infantil, ilustrado polo Premio Nacional Emilio Urberuaga, que conta a relación entre un neno e unha pequena árbore que vai medrando no patio do colexio grazas ao agarimo que recibe do rapaz e ao afecto doutros compañeiros que seguen o seu exemplo.

A presentación, dirixida a público infantil e familiar, contará coa colaboración do músico Paco Nogueiras.

Máis información do evento en Facebook aquí //
Entrevista a Antonio Sandoval no programa ZigZag da TVG aquí 

Recencións: Brabádegos / Trafegando Ronseis / Caderno da Crítica

Teño uns pés perfectos entra na selección White Ravens 2016

O libro Teño uns pés perfectos: un libro para ler cos pés descalzos, de María Solar e publicado por Kalandraka, vén de ser incluído na selección The White Ravens 2016 pola Internationale Jugendbibliothek de Munich, que elixiu 200 obras de 60 países para formar parte desta prestixiosa escolma dos mellores libros infantís e xuvenís.

Con este recoñecemento, o galego é unha das 42 linguas representadas en The White Ravens 2016, cuxo comité de selección destacou que María Solar aborda nesta obra un aspecto tan “novidoso e inusual” como os pés, dando como resultado un libro “informativo e entretido”.
Le máis sobre esta nova aquí.

Parabéns, María!

Héctor Cajaraville gaña o VII Premio Meiga Moira

 Héctor Cajaraville Araujo vén de gañar o 7.º Premio Meiga Moira 2016 de Literatura Infantil-Xuvenil convocado por Baía Edicións.

O Xurado, formado polas escritoras Andrea Maceiras e Conchi Regueiro, María Dores Fernández López,  profesora de Ensino Medio de Lingua e Literatura Galega na Coruña, a tamén escritora Marica Campo, que actuou de Presidenta, e a directora editorial de Baía Edicións, María Belén López Vázquez, como secretaria, reunido o martes  día 11 de outubro de 2016 resolveu conceder por unanimidade o 7.º Premio Meiga Moira de Literatura Infantil-Xuvenil á obra presentada baixo o lema “Briolanxa”, correspondente á presentada polo escritor compostelán Héctor Cajaraville Araujo, que leva como título Denébola a Roxa e que vai dirixida a lectores a partir de 12 anos.

A obra será publicada por Baía Edicións na súa colección Meiga Moira antes de finalizar o ano e o autor recibirá o premio de 2.500 euros.

Na nosa biblioteca (30)

Novas incorporacións para a nosa biblioteca! Hércules de Ediciones envíanos unha novidade ilustrada e da man de Xerais chéganos o catálogo coas 33 obras do benquerido amigo Agustín Fernández Paz.

Aquí tes toda a información:

Título: Max e Lea
Texto e Ilustracións:: Estefanía Padullés
Tradución: Ánxela Gracián
Editorial: Hércules de Ediciones
Colección: Novas lecturas de Hércules

Este libro preséntase o sábado 15 de outubro ás 12 horas na Librería Lume, de A Coruña. Máis información aquí.

Título: Agustín Fernández Paz : catálogo 2016
Editorial: Xerais

Descárgao aquí!

Na nosa biblioteca (29)

E volvemos con máis novidades editoriais! Aquí tedes o último de Rodeira - Edebé e de Sushi Books:

Título: A casa do medo
Texto: Agustín Fernández Paz
Editorial: Rodeira - Edebé
Colección: Periscopio

Descarga un capítulo aquí

Título: A lenda de Sally Jones
Texto e Ilustracións: Jacob Wegelius
Tradución: Moisés Barcia
Editorial: Sushi Books
Colección: Álbum

Título: O xardín dos deuses
Texto: Gerald Durrell
Ilustración da cuberta: Jacobo Fernández Serrano
Tradución: Moisés Barcia
Editorial: Sushi Books
Colección: Avanzado

Este é o 3º libro da triloxía de Gerald Durrell, despois de A miña familia e outros animais e Bechos e demais parentes.

Na nosa biblioteca (28)

Hoxe vimos con máis novidades, desta volta, da man de Kalandraka. ademais da edición en papel da Guía Ninja do Ilustrador:

Título: A árbore da escola
Texto: Antonio Sandoval
Ilustracións: Emilio Urberuaga *
Editorial: Kalandraka
Colección: Demademora

*Reseña en Trafegando Ronseis neste enlace
* Emilio Urberuaga: Premio Nacional de Ilustración 2011

Título: Cepillo
Texto: Pere Calders
Ilustracións: Carme Solé Vendrell
Tradución: Xosé Ballesteros
Editorial: Kalandraka
Colección: Maremar

Premio Lazarillo 1981

Título: Cinco minutos de paz
Texto e Ilustracións: Jill Murphy
Tradución: Sandra e Óscar Senra Gómez
Editorial: Kalandraka
Colección: Tras os montes

Título: A guía Ninja do ilustrador

Coordinación: Alberto Guitián

Texto: Alberto Guitián, María Álvarez, Manel Craneo, Santy Gutiérrez, Henrique Torreiro

Ilustracións: José Domingo, Manel Craneo, Bernal Prieto, Jorge Peral, Nuria Díaz, Santy Gutiérrez, José Domingo, Alberto Guitián, Leandro Barea, Ictioscopio.

Editorial: AGPI

Descárgaa aquí!