Este libro encantoume! Decembro 2023

 

DECEMBRO 2023

Recomendamos Unha veciña de película de Iria Misa.

Con esa frescura característica dos veráns da infancia, Unha veciña de película relata as prodixiosas vacacións de Elsie e Simón, dous irmáns xemelgos que observan con curiosidade a chegada dunha nova veciña. O que comeza como un castigo limpando o xardín da muller, remata por converterse nunha inesquecible aventura. E é que Alice é unha veciña moi singular que posúe un obxecto non menos especial ca ela: un proxector de cine capaz de transportalos a calquera escenario de película.

Narrada cun estilo sensible e desenfadado, que completan as animadas ilustracións de Laura Suárez, a novela trasládanos á evocadora atmosfera das longas vacacións da nenez, onde todo é posible. A trama mestura as vivencias de Elsie e Simón cunha variedade de filmes clásicos que responden ao desenvolvemento dos acontecementos relatados. Porén, o asombro agarda á volta de cada páxina. Porque O mago de Oz, Viaxe á lúa ou Frankenstein non son exactamente como as lembrábamos. A maxia de Alice consegue adaptar o argumento de cada película para que os xemelgos se convertan en protagonistas das mesmas. E invita a soñar cada novo final. Ao acerto da elección dos filmes, representativos de distintos xéneros e épocas, hai que sumar a hábil incorporación de fragmentos guionizados que envolven ao lector ou lectora nun universo fascinante, dando lugar a unha historia áxil e entretida que non esquece temas como a superación dos prexuízos ou a incorporación de modelos de familia diferentes. Unha vez máis, Iria Misa sorpréndenos cunha novela distinta, orixinal e intensa da que non só gozarán os nenos e as nenas, senón calquera amante do cine que se mergulle nas súas páxinas.

Andrea Maceiras

 

________________________

GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.