XANEIRO
2022
Recomendamos:
Ninguén
coma min.
(Autobiografía
dun tirano)
de
Ignacio Chao
Ninguén
coma min, subtitulado Autobiografía
dun tirano, resultou finalista do
Premio
Internacional
Compostela de
Álbum Ilustrado, forma parte de
Los Mejores Libros para Niños y Jóvenes del Banco del Libro na
mención “Transgresión” (segundo citan, por realizar unha
crítica necesaria dende o sarcasmo), formou parte da selección da
OEPLI
e acaba de entrar na prestixiosa lista The White Ravens da biblioteca
xuvenil de Munich.
Trátase
dun relato en primeira persoa no que un porco se retrata de forma
egocéntrica, narcisista e pedante, sentíndose o elixido, un ser
único e admirado por todos. Crese superior e considera que todo debe
estar ao seu servizo. As súas afirmacións asustan, porque nelas
recoñecemos o sentir de dirixentes reais e porque nos mostra unha
realidade que se produciu no pasado e está presente na actualidade.
Este álbum
foi definido como “pouco usual e desconcertante”, por traernos,
de novo, a historia do ditador pero cun desenlace inesperado que lle
dá a volta á crónica, situándoa nun contexto especial que nos
produce perplexidade antes da gargallada final.
Unhas
magníficas ilustracións mostran ese imaxinario de poder, incluso
valéndose das sombras, e engaden significados enriquecendo así a
narración.
Unha
xoia que nos fai reflexionar, porque o discurso dese ditador que fala
de como se ve e como mira o mundo que o rodea, cae polo propio peso
do absurdo, na derradeira páxina, cando descubrimos que non é
libre.
Unha
obra mestra que parte dunha nova de prensa.
Un
libro válido tamén para maiores que o relacionarán con obras de
referencia. Unha lectura que peta na porta da nosa intelixencia para
atender as diferentes capas de significado.
Unha
lección de vida en poucas páxinas, un golpe en pleno peito, unha
parodia.
Pilar
Sampedro
______________________________
GÁLIX
publica cada mes unha recensión feita por algunha ou algún dos
socios para a sección Este
libro encantoume da
OEPLI. Todos os meses poderás
ver neste blog as
recomendacións de Literatura Infantil e Xuvenil en galego e na web
da OEPLI as propostas das asociacións dos diferentes ámbitos
lingüísticos que forman a organización. Se queres colaborar
coas túas recomendacións,
non dubides en nos contactar.