venres, 29 de outubro de 2021

Na nosa biblioteca (259)

Chegounos esta novidade de Hércules Edicións como doazón para a Biblioteca de GÁLIX :

Mortiña e as vacacións no lago Misterio

Título: Mortiña e as vacacións no lago Misterio

Texto: Barbara Cantini

Ilustracións: Barbara Cantini

Tradución: Rosa Marta Gómez Pato e Manuel González González

Editorial: Hércules Edicións

Colección: Novas Lecturas de Hércules
+ info: https://www.herculesediciones.com/gl/libro/mortina-e-as-vacacions-no-lago-misterio/

Novas:

Libraría Couceiro: https://www.youtube.com/watch?v=K7RhntWwB_g

xoves, 28 de outubro de 2021

V Premio Agustín Fernández Paz de narrativa infantil e xuvenil pola Igualdade

O escritor lucense Lois Pérez é o gañador do V Premio Agustín Fernández Paz de narrativa infantil e xuvenil pola Igualdade, convocado polo Instituto de Estudos Chairegos, o Concello de Vilalba e Edicións Xerais de Galicia como homenaxe ao escritor.

A obra gañadora A gruta da torre é, a xuizo do xurado, unha historia de formación protagonizada por un grupo diverso de rapaces e rapazas que emprenden unha viaxe de descuberta seguindo o fío das viaxes nos libros e na memoria, feito que salienta o xurado formado por Iria Misa, Manuel Bragado e Xosé Lastra Muruais que valora tamén que estea escrita con mestría, empregando diversos recursos e rexistros, a novela mantén un pulso narrativo que non decae.

Lois Pérez -mestre, contador de historias e cronista de rock- publicou poesía e teatro, colaborou co grupo de teatro Pinchacarneiro, da Fundación Anade para persoas con diversidade funcional e obtivo en 2008 un dos premios de Teatro Radiofónico da Radio Galega, organizado polo programa Diario Cultural, coa obra Saltimbanqui.

xoves, 21 de outubro de 2021

Na nosa biblioteca (258)

Chegaron á Biblioteca de GÁLIX as novidades da Editorial Baía:

Nos furados das árbores
Por tobos e tobeiras

Título: Nos furados das árbores

Texto: Markéta Špačková

Ilustracións: Ekaterina Klesnikova

Tradución: María Reimóndez

Editorial: Baía
+ info: https://baiaedicions.gal/

Título: Por tobos e tobeiras

Texto: Markéta Špačková

Ilustracións: Ilona Komárková

Tradución: María Reimóndez

Editorial: Baía
+ info: https://baiaedicions.gal/plural.html

venres, 15 de outubro de 2021

A Xanela de GÁLIX. Concha Blanco

Concha Blanco naceu na fermosa vila de Lires, estudou alí na escola, onde comezou a súa biblioteca cun agasallo da súa mestra; logo continuou a súa formación en Ferrol e Compostela.

Profesora de Lingua Galega e Literatura (xubilada) e tamén escritora.

É coordinadora e coautora de varios libros de texto de Primaria e de Secundaria e das correspondentes "Guías Didácticas".

Foi correspondente de prensa varios anos e colaboradora, co seu alumnado, en programas de radio.

Impartiu e coordinou cursos de Lingua Galega, proxectos de Formación do Profesorado, Xornadas de N. L. e obradoiros literarios.

Publicou máis de 50 títulos de narrativa, poesía e teatro, a maioría dirixidos ao mundo infantil e xuvenil, entre os que a autora mencionou:

A vaca titiriteira

A camioneta da media risa.

A disco ecoloxista

O aniversario de Ana

Boris

Boris e compañía

A bruxiña da sorte

Quero que veñan meus pais

Cos ollos do avó

Macedonia de versos

Tamén conta con 5 novelas para adultos:

Nano

Berta

Habitación 202

Coa carauta posta

O balcón do meu universo

Foi premiada en diversos certames de narrativa e poesía: Premio Lecturas, Premio Novela por entregas La Voz de Galicia, Premio Frei Sarmiento en dúas ocasións, Premio Arume de poesía, Premio Pura e Dora Vázquez, Anduriña voandeira e finalista do Premio Lazarillo, Frei Martín Sarmiento en varias ocasión e en varias ocasións tamén finalista do Premio Merlín, entre outros.

No ano 2021 o Concello de Cee dedicoulle unha praza e Asociación de Escritores en Lingua Galega (AELG) decidiu dedicarlle a ela o distintivo «Escritores na súa terra» do ano 2021. Na homenaxe conxunta á autora descubriuse un monólito conmemorativo e plantouse un pradairo, árbore escollida pola homenaxeada polo significado especial que para ela ten.

ACCESO

xoves, 14 de outubro de 2021

Ninguén coma min e santoamaro nos White Ravens 2021

Dous libros galegos aparecen este ano no catálogo coñecido como os White Ravens, porque as obras que o compoñen se consideran tan extraordinarios coma un corvo branco.

Ninguén coma min, un álbum de Ignacio Chao, con ilustracións de Eva Sánchez, publicado por Kalandraka na colección Maremar.

santoamaro de Antonio Manuel Fraga Allegue, publicado por Edicións Xerais de Galicia na colección Fóra de Xogo e Premio Jules Verne de Literatura Xuvenil, 2020.

Cada ano 20 especialistas en literatura infantil e xuvenil seleccióna as obras coas que a Internationale Jugendbibliothek (Biblioteca Xuvenil Internacional) elabora un catálogo con 200 títulos, publicados no ano anterior, procedentes de 56 países e escritos en 38 linguas diferentes, que merecen ser destacados polas súas características (temática, innovación artística, estilo literario, deseño…)

Esta é, xunto coa Listaxe de Honra do IBBY, unha das distincións máis importantes da literatura infantil e xuvenil.

ACCESO AO CATÁLOGO

Este ano, o catálogo presentarase oficialmente o 11 de outubro na feira de Frankfurt.

xoves, 7 de outubro de 2021

Xornadas GÁLIX. Desfacendo a Raia VII: Promoción exterior da LIX galega. Estratexias e axentes de mediación.

Este vindeiro mércores, 13 de outubro de 2021, celebraremos a Xornada profesional Desfacendo a Raia VII: Promoción exterior da LIX galega. Estratexias e axentes de mediación no Salón de Actos da Facultade de Filoloxía e Tradución da Universidade de Vigo. O proxecto recibiu unha axuda do Ministerio de Cultura e Deporte, e celébrase co apoio da OEPLI.

A actividade ten como obxectivo a reflexión sobre o papel que desenvolven os e as axentes mediadores/as na difusión da LIX galega, sempre tan necesaria, pero aínda máis na actualidade.

Participan no acto Ledicia Costas e a súa axente, Hilde Gersen; Ania González, experta en dereitos de autoría intelectual e Laura Sáez unha editora e tradutora, que visita feiras internacionais do libro como Fráncfort ou Boloña en calidade de observadora atenta a incorporalos ao noso patrimonio cultural e ver de promocionar os propios no exterior. Contamos, así mesmo, coa presenza da responsable da administración autonómica en materia de promoción de axudas para a tradución do libro galego, Cristina Rubal, Subdirectora xeral de Bibliotecas e do Libro.

A presentación estará a cargo do presidente de GÁLIX, Xosé A. Perozo.

A xornada está aberta á participación de todas as persoas interesadas no libro infantil e xuvenil galego.

Poderase participar no acto presencialmente ou virtualmente a través da canle da Universidade de Vigo á que se accede por medio do QR do cartel das xornadas ou nesta ligazón: https://tv.uvigo.es/live/5b60870c8f4208dd20625884

GÁLIX pretende, coa organización deste evento, abrir espazos de diálogo entre expertos da mediación literaria e cultural e tamén cos participantes e socias e socios para sacar conclusións ao respecto.