O Centro Internacional del Libro Infantil y Juvenil da Fundación Germán Sánchez Ruipérez propúxolles en maio de 2004 a institucións, asociacións e revistas de todo o Estado a constitución dunha rede de traballo, para a elaboración de proxectos relacionados coa selección de lecturas para nenos e xoves nas catro linguas oficiais.

A partir desa data, na que quedou constituída a Rede de Selección de Libros Infantís e Xuvenís, esta marcouse como primeiro obxectivo harmonizar os esforzos de crítica e valoración de obras que fan especialistas con moitos anos de experiencia, tocante á recomendación de lecturas nas distintas linguas do Estado.

O segundo obxectivo que se plantexou é peneirar da inxente produción actual de libros para nenos e xoves os máis relevantes, tarefa demandada por unha sociedade cada vez máis consciente do importante que é espertar o gusto pola lectura nas primeiras edades.

Por último, pensouse en ofrecer relacións das mellores obras como ferramentas para que os docentes, bibliotecarios, libreiros e familias estimulasen con elas nos pequenos e adolescentes o pracer de ler.

Entre as vinte institucións que participan na Rede, a literatura galega ten dous representantes, a revista Fadamorgana e mais GALIX. O resultado dos traballos recóllense nuns volumes de publicación anual editados pola Fundación Germán Sánchez Ruipérez, que aspiran a ser ferramentas útiles para os mediadores no seu esforzo por achegar lectores e libros, desde o convencemento de que a lectura avivece a imaxinación, a intelixencia e a sensibilidade.