MARZO 2025
Recomendamos Púrpura Tero de David Cortizo
Púrpura Tero é unha novela que mestura ciencia ficción e fantasía e que afunde os seus alicerces no presente. Tamén é un planeta deserto por mor dunha devastación. A planta que constituía a base da vida nese planeta, a xeralaxia, foi sobreexplotada até a súa extinción. A xeralaxia era a principal fonte de enerxía e posuía poderes especiais. O feito de que sexa unha enerxía obtida a partir dun vexetal fai que o seu valor simbólico medre co paso das páxinas. A elección posibilita unha análise sobre a relación que os humanos temos co resto de seres vivos do noso planeta para evidenciar o poder da ecoloxía. Cada vez que unha planta ou un animal se extingue estamos aniquilando a posibilidade de atopar algunha substancia ou solución que nos permita vivir mellor.
No relato resoan homenaxes a Star Wars, Star Trek, Dune e Blade Runner, pero tamén a moitas novelas e películas de serie B. En Púrpura Tero atopamos estirpes, clases sociais, castas, privilexios, seres con luz e un mangado de tribos fartas de vivir baixo o xugo dun poder ditatorial contra o que deciden mobilizarse. Nesa loita terán que percorrer os vieiros de ida e volta que comunican a amizade, a camaradería, o desexo e o amor ao abeiro do saber que acumulan os libros, é dicir, a aprendizaxe e a posibilidade de transmitir esa aprendizaxe a futuras xeracións. Mais en Púrpura Tero tamén se fala da sinceridade das palabras, dos motivos das insurreccións, de atreverse a compartir e de flores que abrollan no deserto. Os tempos semellan ser chegados.
Álex Mene
GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.
0 comentarios:
[Comentario blog]