XANEIRO 2024
Recomendamos A pequena Kuna de Mercedes Pacheco
A historia do pobo Kuna imaxinada por Mercedes Pacheco e ilustrada pola coñecida muralista Vanesa Álvarez mestura o relato coa poesía dun xeito global no que se podería denominar un álbum lírico, musical. O conto, herdeiro dos clásicos rimados, combina a narrativa e os versos intercalados con coloridas imaxes de inspiración caribeña. No resultado todo interactúa como un xogo, versos lúdicos sen estridencias que convidan a cantar:
Do, re, mi, fa, sol, la, si..
Música mestre!
Notas mariñas
En Panamarina
Soan por todas as esquinas.
Corda vento e percusión
arman una gran diversión
Coa frauta, guitarra e acordeón.
A pequena Lúa goza da compaña dos animais na illa Mola-Mola, o seu fogar, mais os seus xogos vanse ver sobresaltados ao atopar a Don Pelícano ferido, e sen pensalo dúas veces, vai nadar ata o barco de Oli, na procura da súa axuda. A pequena Kuna é un fermoso libro transmisor de valores destinado ás crianzas que denuncia a urxencia de coidar do planeta nun ton melódico: Por favor humano // Non nos fagas máis dano // e bótanos un cabo. Se houbese máis poesía o mundo sería un lugar moito mellor, infinitamente mellor e máis habitable. Que falta nos fai!
Ana Luna Alonso
________________________
GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.
0 comentarios:
[Comentario blog]