Este
venres, 24 de marzo, asistimos á xornada formativa "Un bosque
cheo de libros. A literatura infantil e xuvenil en galego na
actualidade" organizada dende a Biblioteca de Galicia. onde podemos aínda visitar a exposición "Unha
árbore de historias.
Cen
anos de literatura infantil e xuvenil en galego" comisariada pola profesora Montserrat Pena Presas.
Na
inauguración do acto Anxo Lorenzo, Secretario xeral de Cultura,
falou do valor da lectura, da importancia da LIX na actualidade, dos
libros publicados e agradeceu o labor discreto e constante de GÁLIX.
Fina
Casalderrey e Montse Pena Presas mantiveron unha animada e amena
conversa sobre a lectura e a literatura e compartiu connosco o seu
coñecemento, a súa experiencia e as súas opinións. Falounos dos
carapuchólogos que, en cada época tratan de adaptar as historias á
ortodoxia do momento e da capacidade da literaturae dos contos para
coñecer a historia, como se vivía naqueles tempos, que se
valoraba...
Na
mesa sobre narrativa coincidiron en que se trata dun xénero
consolidado. Ana Luna fixo un breve e completo percorrido pola
historia e o presente da tradución ao galego. Paz Pereiro informou
sobre as preferencias do lectorado, o nivel de lectura e as accións
de mediación da Asesoría de bibliotecas escolares e das bibliotecas
dos centros educativos. Andrea Maceiras destacou o labor das
bibliotecas na mediación e na descuberta libre de lecturas. Maceiras
considera que gozamos dun sistema literario diverso e de gran
calidade. Libre e valente.
Na
segunda mesa destacaron a calidade e a innovación da poesía
infantoxuvenil galega. Anxos Rial afirmou que a poesía é a linguaxe
natural da adolescencia, aínda que eles non o saiban e aportou
xeitos de familiarizar á rapazada coa poesía. Antonio García
Teijeiro afirmou que cre no poder transformador da poesía, na que
calquera pode identificar os seus sentimentos.
María
J. Caamaño, Roberto Pascual e Paula Carballeira falaron de teatro. A
profesora Caamaño fixo un percorrido pola literatura dramática
infantil galega ata a actualidade e falou dos premios de teatro
infantil en Galicia. Pascual falou de experiencias internacionais de
teatro infantil para a infancia. Paula Carballeira, que rematou a
sesión da mañá, indicou que o teatro é o mellor dos medios para a
transmisión da lingua e a cultura e afirmou que as obras dramáticas
están pensadas para ser representadas, pero que tanto o teatro coma
a narración oral son artes efímeras que so permanecen cando se
publican.
Pola
tarde Eva Mejuto falounos do álbum ilustrado como traballo
colaborativo onde o texto e a imaxe crean unha unidade; un xénero
para todas as idades no que se poden tratar todos os temas e comentou
a ausencia de álbums que traten o tema da guerra civil. Paz Castro
amosounos e comentou os libros gañadores do Premio Compostela.
Federico Fernandez describiu o proceso de creación dun álbum.
Na
mesa dedicada á banda deseñada Xulio Carballo comentou as primeiras
experiencias de revistas de historietas. Fausto Isornas falounos de
Golfiño e lembrounos a serie de Simón Martel. Inés Vázquez
presentou a súa obra Aldara e asegurou que na noso historia e a nosa
mitoloxía son unha fonte de temas para o cómic.
Rematou
esta intensa xornada formativa a conferencia de Rosa Tabernero,
reivindicou a lectura tranquila, en profundidade, fronte á dixital
que se demostra superficial, falounos da importancia da selección e
da biblioteca
e o libro como espazo de hospitalidade, lugar e tempo de acollida
nesta época na que abundan os non lugares.