O próximo luns, 8 de febreiro, en sesión de tarde (16.00 – 20.00) celébranse estas Xornadas coa colaboración do Consello da Cultura Galega.
Ante a imposibilidade de realizalas de forma presencial retransmitiranse en directo a través da canle de YouTube de GALIX.
A Asociación Galega do Libro Infantil e Xuvenil (sección da OEPLI correspondente ao ámbito galego) ten entre as súas funcións recoller, promover, programar e executar iniciativas para a difusión do libro infantil e xuvenil galego. Por esta razón, faise necesario ter unha visión global da súa situación e, unha vez analizada, tentaranse aplicar as medidas necesarias para súa mellora.
Estas Xornadas, que recibiron axuda do Ministerio de Cultura e Deporte, estaban programadas a modo en encontro, no que poñentes e participantes reflexionaran conxuntamente no diagnóstico e intervención; de todas formas, tentarase recoller voces variadas que acheguen riqueza e diversidade ao debate.
Adaptándonos ás circunstancias e para dar comezo, contamos cun par de visións xerais (Manuel Bragado e Mª Jesús Fernández), e tres miradas sobre xéneros que non están tan representados na produción galega como son o libro informativo, a cargo de Xosé Ballesteros, editor de libros de coñecemento; o teatro, da man de Cándido Pazó, dramaturgo; e a banda deseñada, para o que contamos con Kiko da Silva, autor de banda deseñada que ao tempo tamén a edita e dirixe unha escola especializada en cómic (O Garaxe Hermético).
Interesa dar a coñecer as fortalezas do libro infantil e apoiar aqueles xéneros que poden precisar dalgunha acción positiva. Porque, poñer o libro infantil galego no centro do debate, é o obxectivo da asociación.
0 comentarios:
[Comentario blog]