Día do Libro e Dereitos de Autoría 2020

Para celebrar o Día Mundial do Libro e Dereitos de Autoría, a UNESCO escolleu un día simbólico, a data na que finaron Miguel de Cervantes e William Shakespeare, 23 de abril.

Aínda nas actuais e excepcionais circunstancias nas que nos atopamos, a Asociación Galega do Libro Infantil (GÁLIX) non quere deixar de celebralo con todas as persoas grandes e pequenas que forman o lectorado galego e con esta intención propón sumarse ás dúas iniciativas do IBBY nas que poden participar persoas de todas as idades.

Animamos ás nenas e nenos que se retraten nestes días de confinamento para configurar unha exposición dixital formada polos retratos e sentimentos das nenas e nenos de todo o mundo nestes tempos de andazo e confinamento.

Como te atopas estes días? Como vives coas restricións? Fai un autorretrato e mándao escaneado para que apareza na galería dixital da exposición. Envía o teu debuxo e indica o teu nome, a túa idade e que fas o envío a través de GÁLIX (Galicia, España) ao enderezo electrónico: direktion@ijb.de.

Lectura do manifesto Fame de palabras

A xunta directiva de GÁLIX únese, con este vídeo, á iniciativa do IBBY na que propón a todas as súas seccións a lectura en rede  do manifesto do Día Internacional do Libro Infantil no seu idioma. Convidamos, logo, a todas as persoas socias de GÁLIX a gravar un vídeo lendo a tradución do manifesto deste ano, titulado “Fame de palabras”, redactado orixinalmente por Peter Svetina e ilustrado por Damijan Stepancic, e que o pendure nas redes sociais o Día do Libro (23 de abril) etiquetando a GÁLIX. A tradución ao galego foi realizada por Héctor Cajaraville.

A tradución está dispoñible na seguinte ligazón: http://www.galix.org/2020/03/2-de-abril-dia-internacional-do-libro.html

Máis nesta categoría 2020 coronavirus Día do Libro Día do Libro e Dereitos de Autoría ibby