Mestre das viaxes imaxinarias, Xabier P. Docampo

Este martes 4 de xuño de 2019, na Biblioteca Pública Ánxel Casal dedicamos o día á lectura dos textos de Xabier P. Docampo, porque tal como nos dixo Pilar Sampedro, organizadora do evento: "A lectura, e máis na nosa lingua, é sempre un acto de resistencia e identidade, por eso o mellor recoñecemento para un escritor tan comprometido é lelo".

As súas amistades e os seus lectores e lectoras, admiradores todos da obra e a persoa de Xabier P. Docampo, enchemos, dende as 10 da maña ás 9 da noite, o salón de actos da biblioteca no emotivo recoñecemento ao Mestre das Viaxes Imaxinarias, o fermoso título que Héctor Cajaraville pensou para a homenaxe.

Pola mañá participaron no acto os centros escolares composteláns. Durante todo o día centos de persoas, a título individual ou como representantes de diversos colectivos, achegáronse para poñer voz ás palabras de Xabier. Chus Fernández, amiga, crítica e máxima coñecedora da súa obra agasallounos cunha fermosa charla titulada Xabier P. Docampo, o escritor. Tradición e modernidade. Para rematar o acto Xosé Antonio Perozo, presidente de GÁLIX, fíxolle entrega á familia, da figura conmemorativa de Socio de Honra que se lle concedera en 2018 e que non se lle puido entregar no seu momento.

As fotos do acto están en:  https://photos.app.goo.gl/v1XTfAcDCG5r8GGPA

https://www.elcorreogallego.es/santiago/ecg/homenaxe-xabier-p-docampo-coa-lectura-dunha-escolma-das-suas-obras/idEdicion-2019-06-05/idNoticia-1187021/

Máis nesta categoría eventos homenaxe LIX socios de honra Xabier P. Docampo