Novas da LIX (e marchamos de vacacións!)

Achégase agosto e marchamos de vacacións, non sen antes vos deixar unhas poucas novas da LIX que poden ser do voso interese.

• Mañá, 1 de agosto, Anxo Fariña asinará e fará ilustracións dos seus libros na Feira do Libro de A Coruña.
• A vindeira semana, o 7 de agosto, inaugúrase a exposición Viñetas desde o Atlántico na Coruña.
• Taboleiro do Libro galego: os máis vendidos do mes de xuño na revista electónica  Cicloxénese Expresiva. Para a elaboración deste taboleiro participaron as librarías: Miranda, Paz, Andel do libro, Suévia, Lila de Lilith e Chan da Pólvora.
•  Entrevista a Eli Ríos no blog O recuncho do lector.
• Lamentamos o pasamento do escritor galego de literatura infantil e xuvenil Carlos Mosteiro Fraga (Xeve, Pontevedra, 1955 - Pobra do Caramiñal, 2017), que fora Premio O Barco de Vapor por Unha bruxa ben rara (SM, 2007). [Máis info en Lavoz, Culturagalega, Fervenzas Literarias]

Boas lecturas ao sol! :)

Un paso máis cara ao Premio de Teatro Infantil e Xuvenil Carlos Casares

Esta semana, o presidente de GÁLIX e a OEPLI, Xosé Antonio Perozo, xunto co vicepresidente Antonio Seijas, Mercedes Pacheco de Auga Editora e David Cortizo de Urco, reuníronse co presidente da Deputación de Ourense, Manuel Baltar, para analizar a nosa proposta para a creación dun premio de teatro infantil e xuvenil baixo o nome de Carlos Casares.

A iniciativa propón un premio de carácter anual cuxa convocatoria coincida coa data de nacemento de Carlos Casares, o 24 de agosto. O ditame do xurado tería lugar na mesma data do ano seguinte. O Teatro Principal de Ourense acollería no Nadal seguinte a representación da obra gañadora.

A nova na web da Deputación.

Máis guías de lectura para o verán

Velaquí máis guías de lectura para este verán! Estas veñen da man do colectivo Lemos Le, formado por bibliotecas escolares e bibliotecas públicas municipais da comarca de Lemos e a Asociación de Libreiros de Monforte.

Todas as guías de lectura no blog de Lemos Le

• Prelectores e primeiros lectores
• Lectores autónomos e lectores expertos
• Mozos adultos e familias

Na nosa biblioteca (66)

Novidades de Kalandraka na nosa biblioteca este mes:

Título: Os días lebre
Texto: Clara López
Ilustracións: Marcos Viso
Editorial: Kalandraka
Colección:Poesía ilustrada

Título: Caracol, onde estás?
Texto e Ilustracións: Tomi Ungerer
Editorial: Kalandraka
Colección:Tras os montes

Biblioteca en Acción coas persoas #refuxiadas

En apoio de Acampa, a Biblioteca Municipal Durán Loriga de A Coruña está a realizar unha mostra bibliográfica que, co título Biblioteca en Acción. Refuxiadas, recomenda obras de ficción e divulgación sobre as persoas #refuxiadas.

Na mostra pódense atopar contos, documentais, ensaios, novelas, cómics, etc. para todas as edades. Esta mostra, que tamén está dispoñible para o préstamo, intenta divulgar e visibilizar a realidade que viven milleiros de persoas que fuxen da dor, do sufrimento, das inxustizas, etc. e buscan refuxio fóra da súa terra natal.

A guía de lecturas recomendadas pódese ver nesta ligazón.

Obras galegas na Lista de Honra do IBBY

Estamos felices de compartir con vós a nova das obras galegas seleccionadas para pasar a formar parte da Lista de Honra do IBBY:

Lendo lendas, digo versos, de Antonio García Teijeiro e Antonio García Reigosa. (Ed. Xerais, 2016)

Botchan, traducido por Mona Imai. (Sushi Books. , 2016)


Máis información aquí.

Na nosa biblioteca (65)

Temos na biblioteca un novo número da revista Platero:

Título: Platero: revista de Literatura Infantil-Juvenil (nº. 211, maio-xuño 2017)

Editorial: Seminario de Literatura Infantil y Juvenil. Centro de Profesores y Recursos. Oviedo

Inicio: 1986

Periodicidade: Bimestral

Número especial de reseñas. Un repaso da LIX que abrangue dende edicións bilingües a prelectores, narrativa de peto, adaptacións, etc. 

Bibliografías comentadas de libros de autores galegos como:

• Á árbore da escola
• A neve interminable
• Historia da bicicleta dun home lagarto
• Jules Verne e a vida secreta das mulleres planta

Na nosa biblioteca (64)

Rematamos a semana coas últimas publicacións de Oqueleo:

Título: Kibuko
Texto: Xavier Estévez
Ilustracións da cuberta: Elena Hormiga
Editorial: Oqueleo / Santillana - Obradoiro
Colección: Laranxa (+ 10)

Título: Nube de neve
Texto: Xabier P. DoCampo
Ilustracións: Xosé Cobas
Editorial: Oqueleo / Santillana - Obradoiro
Colección: Amarelo (+6)

Reseña de Pilar Sampedro no seu blog

Na nosa biblioteca (63)

Velaquí a última publicación de Sushi Books:

Título: Jim Botón e Lucas o maquinista
Texto: Michel Ende
Ilustracións: Franz Josef Tripp
Tradución: Moisés Barcia
Editorial: Sushi Books / Rinoceronte Editora
Colección: Intermedio

Podes ler as primeiras páxinas do libro aquí.E aquí podes ver unha reseña de Estíbaliz Espinosa na que elixe este libro como recordo especial da súa infancia.

Este libro encantoume (xullo 2017)

XULLO, 2017

Recomendamos: Oxalá estiveses aquí, de Charo Pita

"Oxalá estiveses aquí” é a frase que, a modo de mensaxe, atopa Lebre na  botella que chega polo río. Cangrexo, Lagarta, Abella e Vento Norberto son os amigos de Lebre. Eles, só cando se deciden a facelo entre todos, conseguirán extraer a folla coa misiva, a modo de tesouro.  Non saben quen escribiu a nota nin onde o fixo, e pregúntanse: onde é que está “aquí”? A folla é descoñecida para eles, polo tanto ha de ser algún árbore das Terras do Alén, e cara alí se dirixe Lebre.  Vai, contra a opinión dos demais, que consideran que a Gran  Pradaira é o mellor lugar do mundo.
Leva os seus agasallos: a pinza enorme do Gran Tataracangrexo, un líquido para camuflarse, unha buguina do vento, un chisco de mel e un consello “cando te atopes nunha situación difícil, respira profundamente. Airearse sempre axuda” dille Vento.
No seu camiño, cara o nacemento do río, coñecerá o garda fronteira Teixo que lle informa que é a segunda lebre que cruza, Gato salvaxe do que se fará amiga ao quitarlle unha espiña, Salmón que tamén vai río arriba detrás dun misterio, Vella Lebre que a salva da nube de paxaros negros que están a punto de acabar con ela, Morcego que non entende que haxa alguén diferente a el, Rato que se fai o monstro para defenderse dos perigos... e por fin, á beira da fonte da que nace o río, atopa a Tartaruga que confesa ter escrito a mensaxe. Unha vez logrado o obxectivo, seguiremos lendo para descubrir que é o que vai facer este pequeno animal que transforma o medo en valentía.
Unha narración que fala de emocións e sentimentos, da amizade e dos retos, das dificultades e as marabillas da vida. Unha fábula chea de leccións básicas, das ensinanzas que sempre debéramos ter presentes e da tenrura que aflora nos libros de Heine ou de Janosh.
A autoroa, narradora oral, fía unha historia cos recursos do relato e a maxia da oralidade.
As ilustracións, que se caracterizan pola economía de liñas e a sinxeleza dos trazos, teñen unidade e personalidade propia. Elas tamén expresan os sentimentos que atravesan  e impregnan a novela.

Pilar Sampedro

______________________________

GÁLIX aporta cada mes unha reseña feita por algún socio para a sección Este libro encantoume da OEPLI, ao igual que o resto de seccións. Todos os meses poderás ver as recomendacións das seccións aquí, na web da OEPLI e as de GÁLIX, ademais, no noso blog (bota un ollo na barra lateral!). Se queres colaborar coas túas reseñas para esta sección, non dubides en nos contactar.